മഞ്ഞുറയും ദേശം!

മഞ്ഞുറയും ദേശം!

അന്തരീക്ഷ ഊഷ്മാവും ഇലക്ഷൻ ചൂടും ചേർന്ന് കേരളം ചുട്ടുപൊള്ളുകയാണല്ലോ- അതിനെ ഒന്നു ശമിപ്പിക്കാൻ ഒരു തണുത്ത വാർത്ത പറയാം.
ചിത്രത്തിൽ കാണുന്നത് യാകൂറ്റിയ എന്ന സൈബീരിയൻ പട്ടണത്തിലെ കോൾഡ് സ്റ്റോർ ആണ്. അന്തരീക്ഷ ഊഷ്മാവ് -40 യിലും താഴെ ആയതുകൊണ്ട് ഫ്രീസറിന്റെ ആവശ്യം ഇല്ല. കേരളത്തിൽ ഇപ്പോൾ വിൽക്കുന്ന ഏറ്റവും നല്ല ഫ്രീസറിനു പോലും അത്രയും തണുപ്പ് താങ്ങാനാകില്ല. ആ അമ്മച്ചി ചെവിയിൽ തൂക്കിപ്പിടിച്ചിർക്കുന്ന മുയൽ ചത്തിട്ട് മാസങ്ങളായി. ഇനി വർഷങ്ങൾ അങ്ങിനെ തന്നെ ഇരുന്നുകൊള്ളും!

പറയാൻ വന്നത് യാക്കൂറ്റിയയെക്കുറിച്ച് അല്ല. അവിടേ നിന്നും രണ്ടു ദിവസം യാത്ര ചെയ്താൽ ഒയ്മിയാക്കൊൺ എന്ന ചെറു ഗ്രാമത്തിൽ എത്തിച്ചേരും. ഈ ഗ്രഹത്തിലെ മനുഷ്യവാസമുള്ള ഏറ്റവും തണുത്തുറഞ്ഞ ഗ്രാമമാണിത്. കണക്കാക്കിയ ഏറ്റവും കൂടിയ തണുപ്പ് (ചൂട് എന്ന് പറയുന്നതാണ് ശരി, തണുപ്പ് അളക്കാനാകില്ലല്ലോ) -71.2 °C ആണ്. ഇതു രേഖപ്പെടുത്താൻ പറ്റുന്ന ഉപകരണങ്ങളൊന്നും എളുപ്പത്തിൽ ലഭിക്കില്ല, ഉപഗ്രഹങ്ങൾ വഴി കണക്കുകൂട്ടി എടുത്തതാണ്. .
ഏതാണ് 500 പേർ ഒയ്മിയാക്കൊണിൽ സ്ഥിരതാമസമുണ്ട്. ഫോൺ ഇല്ല, സിഗ്നൽ ഇല്ലെന്ന് മാത്രമല്ല, ഇപ്പോൾ ഉപയോഗത്തിലുള്ള ഫോണുകളൊന്നും അവിടെ പ്രവർത്ത്ക്കുകയും ഇല്ല.
ഒരു സ്കൂൾ, ഒരു പലചരക്ക് കട, കൽക്കരി ഉപയോഗിക്കുന്ന ഒരു ഹീറ്റിങ് പ്ലാന്റ്, ചെറിയ ആശുപത്രി, - ഇത്രയുമൊക്കെയാണ് ഒയ്മിയാക്കൊൺ പട്ടണം. വണ്ടികൾ 24 മണിക്കൂറും ഓൺ ചെയ്തിട്ടില്ലെങ്കിൽ ഇന്ധനവും എഞ്ചിനും ഉറഞ്ഞു പോകും. നേത്ര രോഗമുള്ളവർക്ക് കണ്ണട ഉപയോഗിക്കാനാകില്ല, മഷി ഉറഞ്ഞു പോകുന്നതുകൊണ്ട് പേന പ്രചാരത്തിലില്ല.
മീറ്ററുകണക്കിനു മഞ്ഞ് മാന്തി, തണുത്തുറഞ്ഞ ഭൂമി കുഴിച്ച് ശമമടക്കുന്നതാണ് ഒയ്മിയാക്കൊണിലെ ഏറ്റവും ദുരിതം നിറഞ്ഞ ജോലി. കൽക്കര്യിട്ട് കത്തിച്ച് മണ്ണ് ചൂടാക്കി നാലും അഞ്ചും ദിവസം കുഴി കുഴിക്കേണ്ടിവരും.

മഞ്ഞ് മൂടിക്കിടക്കുന്നതിനാൽ പച്ചക്കറി, പഴവർഗ്ഗങ്ങൾ എന്നിവ കൃഷിചെയ്യുന്നില്ല. റെയിൽ ഡീറിന്റെയും കുതിരയുടേയും പാലും ഇറച്ചിയും മത്സ്യവുമാണ് മുഖ്യ ആഹാരം. കുതിരയുടെ രക്തം ക്യൂബുകളായി സൂക്ഷിച്ച് മാക്രോണിയിൽ വേവിച്ച് കഴിക്കുന്നതാണ് വിഷിഷ്ടഭോജ്യം.

കുറുക്കന്റേയും റെയിൻ ഡീറിന്റേയും രോമം കത്രിച്ച് കുപ്പായങ്ങൾ ഉണ്ടാക്കുന്നതും, മഞ്ഞിലെ മീൻ പിടുത്തവുമാണ് പ്രധാന ജോലികൾ!
ന്യൂസിലാൻഡ്കാരനായ ആമോസ് ചാപ്പൽ ഒയ്മിയാക്കൊൺ സന്ദർശിച്ചപ്പോൾ എടുത്ത ചിത്രങ്ങൾ ആണ് ചേർത്തിർക്കുന്നത്. ക്യാമറ തണുത്തുറഞ്ഞ ഫോക്കസ് ചെയ്യാനാകാതെ പലപ്പോഴും ചിത്രങ്ങൾ എടുക്കുവാൻ കഴിഞ്ഞിരുന്നില്ലത്രേ.

എല്ലാ മാസങ്ങളിലും മഞ്ഞ് മൂടി മൂടിക്കിടക്കുന്ന ഒയ്മിയാക്കൊണിൽ ഒരു കാലാവസ്ഥയേ ഉള്ളൂ- ശൈത്യം!
ഒരു നിറമേയുള്ളൂ പ്രകൃതിക്ക്- തൂവെള്ള.

എങ്കിലും കുറെ മനുഷ്യർ അവിടെയും താമസിക്കുന്നു.
എന്തിനാണ് അവർ അവിടെ താമസിക്കുന്നത്?
എന്തായിരിക്കാം അവരെ ജീവിക്കാൻ പ്രേരിപ്പിക്കുന്നത്?